CHADEMA Vs CCM KIMENUKA KALENGA-IRINGA.

Katibu wa CCM mkoa wa Iringa, Salum Mtenga akimnadi mgombea wa CCM, Godfrey Mgimwa katika Kijiji cha Ilala Simba

KATIBU Mkuu wa Chama cha Demokrasia na Maendeleo (CHADEMA), Dk. Willibrod Slaa, amewataka wananchi wa Jimbo la Kalenga mkoani hapa kutambua kuwa chama hicho kipo kwa lengo la kuwatetea wananchi bila kujali itikadi za vyama 

Iringa. Naibu Katibu Mkuu wa (CCM)-Bara, Mwigulu Nchemba amewataka wananchi wa jimbo hilo kumchagua Mgombea wa Chama hicho, Godfrey Mgimwa ili awaletea maendeleo yanayotokana na utekelezaji wa ilani ya chama hicho tawala.
Wakati CCM ikisema hayo, Mwenyekiti wa Baraza la Vijana la Chama cha Demokrasia na Maendeleo (Bavicha) John Heche amesema, chama hicho kitasimamia maoni ya wananchi yaliyomo katika Rasimu ya Mabadiliko ya Katiba.
Akizungumza jana kwenye kampeni za uchaguzi katika Kijiji cha Magubike na Nzihi Kata ya Nzihi, Nchemba ambaye pia ni Naibu Waziri wa Fedha alisema, anayeweza kusimamia utekelezaji wa ilani hiyo ni Godfrey Mgimwa kutoka CCM.
Aliwataka Wanakalenga kuchagua mbunge anayetokana na CCM ili kuendeleza na kukamilisha miradi ya umeme na maji ambayo imeanza kutekelezwa tangu 2010.
Alisema Wanakalenga wakimchagua mbunge kutoka chama cha upinzani, wataendelea kupata shida zikiwamo za kukosa maji na umeme
Naye Godfrey Mgimwa aliwaomba Wanakalenga kumpa kura za ndiyo ili aweze kuungana na wabunge wengine katika kupeleka maendeleo katika jimbo hilo lenye changamoto nyingi za elimu, afya na mawasiliano.
Alisema yeye siyo mzungumzaji, bali ni mtendaji na kuwa atafanya mambo mengi ikiwamo kutekeleza ahadi ambazo baba yake alikuwa bado hajazitekeleza za madawati na uchangiaji wa ujenzi wa zahanati na shule katika Kata za Kalenga.
Katika mkutano uliofanyika katika Kata ya Ipamba, Heche alisema, wameanza mchakato wa katiba kwa gharama kubwa, huku akishangazwa na hatua ya CCM kuandaa waraka unaobadili mambo yote muhimu yaliyoandikwa katika Rasimu hiyo na Tume ya Katiba iliyokuwa ikiongozwa Jaji Joseph Warioba.
Alitaja moja ya sababu ya chama hicho kuwataka wamchague mgombea ubunge kupitia Chadema kuwa, CCM imeshindwa kuwaletea maendeleo kwa zaidi ya miaka 50 tangu uhuru.
“Kila wakati wa uchaguzi, CCM huja na kutoa ahadi lukuki kuwa tutawaletea maji, barabara, huduma za afya...leo viko wapi? Tunaomba mumchague Grace, mjaribuni ili awaletee maendeleo,” alisema Heche.
Naye, Grace aliwataka wananchi hao kumchagua ili aende kukomesha vitendo vya manyanyaso ya michango mbalimbali kutoka kwa Serikali.